స్టార్ హీరోయిన్ నయనతార గురించి ప్రత్యేకంగా చెప్పాల్సిన పనిలేదు. అప్పట్లో ‘లక్ష్మి’ సినిమాతో తెలుగు అభిమానులను ఆకట్టుకున్న హీరోయిన్ నయనతార, ఆ తర్వాత ఇండస్ట్రీని దున్నేశారు. తెలుగులోనే కాదు అన్ని భాషల్లో నయనతార తనకంటూ ఒక గుర్తింపు తెచ్చుకున్నారు. అయితే అలాంటి నయనతార ఇటీవల మెగాస్టార్ చిరంజీవి నటించిన ‘మన శంకర్ వరప్రసాద్ గారు’ సినిమాతో సందడి చేశారు. సినిమా మొన్న సంక్రాంతి కానుకగా వచ్చి సక్సెస్ అయింది. అయితే వయసు పెరుగుతున్నప్పటికీ నయనతార క్రేజీ ఏమాత్రం తగ్గడం లేదు. లేడీ సూపర్ స్టార్ ట్యాగ్ దక్కించుకున్న ఆమె.. వరుసగా సినిమాలతో దూసుకు వెళ్తున్నారు. ఈ నేపథ్యంలోనే మరో స్టార్ హీరోతో కొత్త ప్రాజెక్టు దక్కించుకున్నారట. సల్మాన్ ఖాన్ హీరోగా చేస్తున్న ఓ సినిమాలో నయనతారకు అవకాశం వచ్చినట్లు చెబుతున్నారు. వంశీ పైడిపల్లి దర్శకత్వంలో ఈ సినిమా రాబోతుందని టాక్. దీనిపై అతి త్వరలోనే అధికారిక ప్రకటన రాబోతున్నట్లు తెలుస్తోంది. ఇదిలా ఉండగా ఇండస్ట్రీలో ప్రస్తుతం మరో ఆసక్తికరమైన వార్త చర్చనీయాంశంగా మారింది. నయనతార నటించిన ‘జవాన్’ సినిమా భారీ విజయాన్ని సాధించగా, అందులో ఆమె షారుఖ్ ఖాన్ సరసన నటించి బాలీవుడ్లో బలమైన ప్రభావం చూపింది. ఇక ఆమె రాబోయే చిత్రం యశ్ ‘టాక్సిక్’పై కూడా భారీ అంచనాలు నెలకొన్నాయి. ఈ నేపథ్యంలో ‘లేడీ సూపర్ స్టార్’ నయనతార బాలీవుడ్లో మరో పెద్ద అడుగు వేయబోతున్నట్టు సమాచారం. ఇండస్ట్రీలో వినిపిస్తున్న బలమైన వార్తల ప్రకారం, నయనతార ప్రస్తుతం ముంబైకు చెందిన నిర్మాణ సంస్థ మినీ ఫిలిమ్స్ తో ఒక భారీ బాలీవుడ్ ప్రాజెక్ట్ కోసం చర్చలు జరుపుతున్నారని తెలుస్తోంది. ఈ నిర్మాణ సంస్థ కంటెంట్ ఆధారిత సినిమాలను నిర్మించిన సంస్థగా గుర్తింపు పొందింది. ఇప్పుడు వారి తదుపరి ప్రాజెక్ట్ను ఎంతో ప్రతిష్టాత్మకంగా భారీ స్థాయిలో రూపొందించాలనే ఆలోచనలో ఉన్నారని సమాచారం.
భారతీయ సినిమా రంగంలో నయనతార ప్రయాణం నిజంగా విశేషమైనది. ఆమె అందమైన స్క్రీన్ ప్రెజెన్స్, శక్తివంతమైన నటన, అలాగే ఒక సినిమా మొత్తం తన భుజాలపై మోసే సామర్థ్యం వల్ల ఎంతో మంది అభిమానులను సంపాదించారు. దక్షిణ భారత చిత్ర పరిశ్రమల్లో ఎన్నో సంవత్సరాలు ఆధిపత్యం చెలాయించిన ఆమె, ‘జవాన్’తో బాలీవుడ్లో కూడా గుర్తుండిపోయే డెబ్యూ చేశారు. ఇప్పుడు మినీ ఫిలిమ్స్ తమ తదుపరి పెద్ద హిందీ ప్రాజెక్ట్కు నయనతారనే సరైన ఎంపికగా భావిస్తున్నారని ఇండస్ట్రీ వర్గాలు చెబుతున్నాయి. ఇది బలమైన కథతో కూడిన, పాత్రకు ఎక్కువ ప్రాధాన్యత ఉన్న భారీ చిత్రం కావచ్చని సమాచారం. అధికారిక ప్రకటన ఇంకా వెలువడాల్సి ఉన్నప్పటికీ, ప్రస్తుతం జరుగుతున్న చర్చలు చాలా సానుకూలంగా ముందుకు సాగుతున్నాయని ఇండస్ట్రీ వర్గాలు సూచిస్తున్నాయి.
ప్రత్యేక కథలపై మంచి అవగాహన.. సృజనాత్మక దృష్టి కలిగిన నిర్మాత మన్సి బగ్ లా ఈ ప్రాజెక్ట్ను “లేడీ సూపర్ స్టార్” నయనతారతో కలిసి రూపొందించడానికి ప్రయత్నిస్తున్నారని తెలిసింది. ఈ సహకారం నిజమైతే, నయనతార బాలీవుడ్ ప్రయాణంలో ఇది మరో ముఖ్యమైన అధ్యాయంగా నిలిచే అవకాశం ఉంది.
