”పాలమనసు బాలుడు! చమత్కార కృష్ణుడు! సాంఘిక, పౌరాణిక, జానపద, చారిత్రాత్మక చిత్ర నటనా దురంధరుడు! చలన చిత్ర, రాజకీయ సవ్యసాచి! నందమూరి బాలకృష్ణకి జన్మదిన శుభాకాంక్షలు.. ఆయురారోగ్య ఐశ్వర్యాభివృద్ధి రస్తు.. శతమానం భవతి.
– పరుచూరి గోపాల కృష్ణ (ట్విట్టర్)
తండ్రి విశ్వవిఖ్యాత నటసార్వభౌమ నందమూరి తారక రామారావు నట వారసత్వాన్ని పుణికిపుచ్చుకుని తెలుగు నాట తిరుగులేని హీరోగా ఎదిగిన నటుడు నటసింహ నందమూరి బాలకృష్ణ. పౌరాణిక, జానపద, సాంఘిక, చారిత్రాత్మక చిత్రాలలో ఏ పాత్రనైనా అవలీలగా పోషించి కోట్లాది అభిమానులను సంపాదించుకున్న అద్భుత నటుడు బాలయ్య. సినిమాలతో పాటు ఇటు రాజకీయాల్లోనూ రాణిస్తూ ప్రజల మన్ననలు అందుకుంటున్నారు. జూన్ 10… అభిమానులు ముద్దుగా బాలయ్య అని పిలుచుకునే తెలుగు సూపర్ స్టార్ నందమూరి బాలకృష్ణ పుట్టినరోజు. తమ హీరో పుట్టినరోజు అంటేనే అభిమానుల్లో ఎంతో హుషారు. 100కు పైగా చిత్రాలు, నాలుగు దశాబ్దాల సుదీర్ఘ ప్రస్థానంతో ఆయన సినిమా, రాజకీయ రంగాలలో ఒక శక్తివంతమైన వ్యక్తిగా ఎదిగారు. తెలుగు రాష్ట్రాల వ్యాప్తంగా అభిమానులు బాలయ్య జన్మదినోత్సవం సందర్భంగా పరస్పరం శుభాకాంక్షలు తెలుపుకుంటున్నారు. ఎందుకంటే అది నిత్య మాస్ హీరో, నందమూరి వంశానికి గర్వకారణమైన వారసుడు నందమూరి బాలకృష్ణ పుట్టినరోజు. నాలుగు దశాబ్దాల సుదీర్ఘ కెరీర్లో వందకు పైగా చిత్రాలు చేసిన బాలకృష్ణ .. అభిమాన లోకానికి బాలయ్యగా సుపరిచితుడు. ప్రతిష్టాత్మక నందమూరి సినీ కుటుంబానికి చెందిన ఈయన దిగ్గజ నటుడు. ఆంధ్రప్రదేశ్ మాజీ ముఖ్యమంత్రి ఎన్.టి. రామారావు ఆరవ కుమారుడు బాలయ్య. బాలనటుడిగా తన నటనా ప్రస్థానాన్ని ప్రారంభించి, తెరపై అద్వితీయమైన నటనతో పాటు పదునైన సంభాషణలతో ఎంతో కీర్తి గడించారు. పౌరాణిక పాత్రలు మొదలుకొని మాస్, యాక్షన్, మసాలా సినిమాల వరకు అన్ని రకాల పాత్రలను ఎంతో ప్రతిభావంతంగా పోషించారు బాలయ్య. మంగమ్మగారి మనవడు మొదలుకొని సమరసింహారెడ్డి, నరసింహనాయుడు, అలాగే ఇటీవలి బ్లాక్బస్టర్ హిట్ అఖండ, అఖండ 2లో తన నట విశ్వ రూపాన్ని చూపారు. టాలీవుడ్లో అత్యధిక వసూళ్లు సాధించి, మాస్ ఎంటర్టైనర్లను అందించిన ఏకైక నటుడు ఈ నటసింహం. ధైర్యం, గౌరవం, సంప్రదాయాన్ని ప్రతిబింబించే పాత్రలను ఎంచుకోవడంలో తనకు తానే సాటి. బోయపాటి శీను లాంటి దర్శకులతో ఆయన నటించిన చిత్రాలు బ్లాక్బస్టర్లుగా నిలిచి, టాలీవుడ్లో ‘మాస్ హీరో’ అనే భావనను శాశ్వతం చేశాయి. బాలకృష్ణ కేవలం ఒక సినిమా నటుడు మాత్రమే కాదు… ఎమ్మెల్యేగానూ హిందూపురం ప్రజలకు అపూర్వమైన సేవలు అందిస్తున్నారు. ఆరోగ్య రంగంలో ఆయన అందిస్తున్న అధునాతన సేవలు నిరుపేదల ప్రాణాలు నిలబెడుతున్నాయి. ఆయన తన తల్లి పేరిట స్థాపించిన బసవతారకం క్యాన్సర్ ఆస్పత్రిలో అందుతున్న వైద్య సేవలు వెండితెర వెలుగుకు అతీతంగా సమాజం పట్ల ఆయనకున్న అంకితభావాన్ని చాటి చెబుతున్నాయి. ఆహా ఆధ్వర్యంలో రూపొందించిన ‘అన్స్టాపబుల్ విత్ ఎన్బికె’ అనే టాక్ షోతో టెలివిజన్ హోస్ట్గా బాలయ్య అరంగేట్రం చేసి, అందులో తనలోని సరదా, హాస్యభరితమైన కోణాన్ని వినూత్నంగా ఆవిష్కరించారు. ఈ షో భారీ విజయం సాధించడంతో ఎల్లప్పుడూ ఉత్సాహంగా ఉండే బాలయ్యతో సరదా సంభాషణలు జరపడానికి అగ్రశ్రేణి తారలు, రాజకీయ నాయకులందరూ ఎంతో ఆసక్తిని కనబరిచారు. ఈ అద్భుతమైన షో.. బాలయ్యకు, యువతరానికి మధ్య ఆత్మీయ వారధిగా నిలిచింది. అంతేకాదు.. ఆయన చూపిన ఆదరణ తరతరాలకు ఈ షో ద్వారా గుర్తుండిపోతుంది. బాలయ్య పుట్టినరోజును ఆయన అభిమానులు భారీ హంగామాతో ప్రతి ఏటా ఓ పండుగ రోజులా జరపడం ఆనవాయితీ. అలా జరపకపోతే అభిమాన గణానికి అదో వెలితిగా ఉంటుంది. అందుకే.. తమ హీరో పేరు మీద రక్తదాన శిబిరాలు, పేదలకు అన్నదానం, సామాజిక సేవా కార్యక్రమాలు పెద్దఎత్తున నిర్వహిస్తున్నారు. అభిమానులు తమ హీరో పేరిట సమాజానికి ఏదో ఒక మంచి చేయాలని ఆరాటపడుతూ ఉంటారు. బాలయ్యకు కూడా పేదలను ఆదుకునే ఇలాంటి సేవా నిరతి అంటేనే ఇష్టం. ప్రాణం కూడా.
సోషల్ మీడియా ట్రెండ్లు, ప్రేమను కలబోసి నిర్మించే కటౌట్లు.. ఆయన పాత హిట్ చిత్రాల సామూహిక ప్రదర్శనలు అన్నీ ప్రతి ఏటా ఈ పుట్టినరోజు వేడుకల్లో భాగమే. బాలయ్య రాబోయే సినీ ప్రాజెక్టులను పరిశీలిస్తే..ఆ గొప్ప నటుడిలో ఫైర్ ఏ మాత్రం చల్లారలేదని, ఉత్సాహం అణువంత కూడా తగ్గలేదని అనిపిస్తుంది. పట్టుదల, ఉత్సాహం, రిస్క్ తీసుకునే నైజమే.. అరవై ఏళ్లు దాటినప్పటికీ బాలయ్యను పరిశ్రమలో ఒక అపురూపమైన శక్తిగా నిలబెట్టాయి. నిత్య సంచలనాలకు కేరాఫ్ గా నిలుస్తున్న బాలయ్య.. తన జీవితంలో మరో కొత్త వసంతంలోకి అడుగిడుతున్న శుభవేళ… ఒక విషయం స్పష్టమవుతోంది. బాలకృష్ణ ఒక నటుడు, రాజకీయ నాయకుడు మాత్రమే కాదు.. ఒక మరపురాని మానవీయ సంపన్నుడు.
ఎన్టీఆర్ నట వారసత్వం బాలయ్య రూపంలో ప్రపంచవ్యాప్తంగా ప్రజలకు స్ఫూర్తిని, వినోదాన్ని, ఆనందాన్ని పంచుతోంది. నటసింహం నందమూరి బాలకృష్ణ పుట్టిన రోజు సందడి అభిమానుల గుండెల్లో ఫుల్ జోష్ నింపుతోంది. బాలయ్య బాబు బర్త్ డే సందర్భంగా సెలబ్రిటీలు, అభిమానులు భారీ స్థాయిలో శుభాకాంక్షలు తెలియజేస్తున్నారు.
శతాధిక చిత్రాల కథానాయకుడు, హిందూపురం శాసనసభ్యులు నందమూరి బాలకృష్ణకు ప్రముఖ నటుడు, ఏపీ డిప్యూటీ సీఎం పవన్ కళ్యాణ్ హృదయపూర్వక జన్మదిన శుభాకాంక్షలు చెప్పారు. చారిత్రక, జానపద, పౌరాణిక పాత్రలను అద్భుతంగా పోషించి మెప్పు పొందిన హీరో.. ప్రజా జీవితంలో భాగంగా హిందూపురం ప్రాంత అభివృద్ధికి కృషి చేస్తున్నారని, బాలకృష్ణకు సంపూర్ణ ఆరోగ్యం, సుఖసంతోషాలు అందించాలని దేవుడిని ప్రార్థిస్తున్నాను.. అంటూ పవన్ శుభాకాంక్షలు తెలియజేశారు.
బాలయ్య పుట్టిన రోజు వేళ.. సినీ ప్రముఖులు, రాజకీయ నేతలు, అభిమానుల కాంప్లిమెంట్స్ తో సోషల్ మీడియా షేక్ అవుతోంది. ప్రపంచంలోని మూడు అతిపెద్ద చిత్రాల బడ్జెట్లను తలపించేంతటి బడ్జెట్ కలిగిన తెలుగు సినిమా సింహానికి హార్దిక జన్మదిన శుభాకాంక్షలు! ప్రేమ, ఆరోగ్యం, బ్లాక్బస్టర్ విజయాలతో బాలయ్య పుట్టినరోజు వేడుకలు అంబరాన్ని తాకాలని.. ప్రతీ గుండెలో బాలయ్య స్ఫూర్తి శాశ్వతంగా నిలిచిపోవాలని ‘మనసర్కార్- మూవీ మజ్.. టీమ్ మనసారా జన్మదిన శుభాకాంక్షలు అందిస్తోంది. మెనీ మోర్ హ్యాపీ రిటర్న్స్ ఆఫ్ ది డే… బాలయ్య.
