తెలుగు ఫిల్మ్ ఛాంబర్ ప్రతినిధులతో జపాన్ బృందం భేటీ

హైదరాబాద్‌ను చలనచిత్ర కార్యకలాపాలకు ప్రపంచ కేంద్రంగా మార్చాలనే తెలంగాణ ముఖ్యమంత్రి అనుముల రేవంత్ రెడ్డి దార్శనికత, సంకల్పం అందరికీ తెలిసిందే. కంటెంట్ ఓవర్సీస్ డిస్ట్రిబ్యూషన్ అసోసియేషన్ – టోక్యో, జపాన్ నుండి జపాన్ ఫిల్మ్ – అనిమే పరిశ్రమ ప్రతినిధి బృందంతో సంభాషించిన ఉప ముఖ్యమంత్రి మల్లు భట్టి విక్రమార్క, ముఖ్యమంత్రి రేవంత్ రెడ్డి దార్శనికతను, దానిని సాకారం చేయడానికి ప్రభుత్వ నిబద్ధతను పునరుద్ఘాటించారు. డిజిటల్ పైరసీని ఎదుర్కోవడానికి చిత్ర పరిశ్రమకు పూర్తి మద్దతును అందిస్తామని హామీ ఇచ్చారు. కంటెంట్ ఓవర్సీస్ డిస్ట్రిబ్యూషన్ అసోసియేషన్ , తెలుగు ఫిల్మ్ ఛాంబర్ ఆఫ్ కామర్స్ తో ఒక అవగాహన ఒప్పందంపై సంతకం చేసిన సందర్భంగా జపాన్ ప్రతినిధి బృందాన్ని, తెలుగు ఫిల్మ్ ఛాంబర్ ప్రతినిధులను ఉప ముఖ్యమంత్రి మల్లు భట్టి విక్రమార్క అభినందించారు. చిత్ర పరిశ్రమ లక్ష్యాలను సాధించడానికి ప్రభుత్వం నుండి ఎప్పటికప్పుడు అవసరమైన అన్ని సహాయాలను అందిస్తామని హామీ ఇచ్చారు. తెలుగు చలనచిత్ర పరిశ్రమ ముఖ్యమంత్రి రేవంత్ రెడ్డి, గౌరవ ఉప ముఖ్యమంత్రులకు వారు ఇస్తున్న మద్దతుకు కృతజ్ఞతలు తెలిపింది. జపాన్ ప్రతినిధి బృందం ఉప ముఖ్యమంత్రి ప్రోత్సాహానికి కృతజ్ఞతలు తెలిపింది. ముందుగా వారు ప్రజా భవన్‌లో ఉప ముఖ్యమంత్రికి కంటెంట్ ఓవర్సీస్ డిస్ట్రిబ్యూషన్ అసోసియేషన్ ప్రయాణం , భారతదేశంలో.. ప్రపంచవ్యాప్తంగా జపనీస్ కంటెంట్‌కు పెరుగుతున్న ప్రజాదరణ గురించి వివరించారు. జపాన్‌లో తెలుగు చిత్రాలకు పెరుగుతున్న ఆదరణ గురించి కూడా తెలిపారు. తరువాత జపాన్‌లోని టోక్యోలోని కంటెంట్ ఓవర్సీస్ డిస్ట్రిబ్యూషన్ అసోసియేషన్ ప్రతినిధి డైరెక్టర్ టకేరో గోటో, అంతర్జాతీయ వ్యవహారాల డిప్యూటీ సీనియర్ డైరెక్టర్ తత్సుయ ఓట్సుకా, తెలుగు ఫిల్మ్ ఛాంబర్ ఆఫ్ కామర్స్‌ను సందర్శించి ఈ సంతకం చేశారు. డిజిటల్ పైరసీకి వ్యతిరేకంగా బెస్ట్ ప్రాక్టీసెస్, వ్యూహాలు, ఉమ్మడి ప్రచారాలపై నాలెడ్జ్ ని పంచుకోవడానికి ఈ ఎం.ఓ.యు రూపొందించడం జరిగింది. ఆ తర్వాత బృందం యాంటీ వీడియో పైరసీ సెల్ ఉపయోగించే పద్ధతులు, సాఫ్ట్‌వేర్ సాధనాలను పరిశీలించింది. పైరసీని ఎదుర్కోవడంలో తెలుగు ఫిల్మ్ ఇండస్ట్రీ విధానాన్ని ప్రశంసించింది. ఇటీవలి కాలంలో డిజిటల్ పైరసీ ఒక అంతర్జాతీయ క్రైమ్ గా ఉద్భవించింది. చట్టవిరుద్ధమైన బెట్టింగ్, ఐడెంటిటీ థెఫ్ట్, ఆన్‌లైన్ మోసం, మాల్వేర్ వ్యాప్తి.. చాలా వైవిధ్యమైన స్వభావం గల సైబర్ నేరాలు డిజిటల్ పైరసీతో ముడిపడి ఉన్నాయి. ఈ పరిస్థితిని సమర్థవంతంగా ఎదుర్కోవడానికి ప్రపంచవ్యాప్తంగా పరిశ్రమలు, సంస్థలు, ప్రభుత్వాలు ద్వైపాక్షిక బహుళ-పాక్షిక ఒప్పందాలు సహకారాన్ని కలిగి ఉండవలసిన అవసరం ఉంది. ఈ సందర్భంలోనే కంటెంట్ ఓవర్సీస్ డిస్ట్రిబ్యూటర్స్ అసోసియేషన్ కు ప్రాతినిధ్యం వహిస్తున్న జపనీస్ ఫిల్మ్ అనిమే పరిశ్రమ తెలుగు ఫిల్మ్ ఛాంబర్ ఆఫ్ కామర్స్ తో ఒక అవగాహన ఒప్పందం కుదుర్చుకుంది. జపనీస్ ఫిల్మ్ / అనిమే పరిశ్రమతో ఈ రకమైన అధికారిక సహకారాన్ని కలిగి ఉన్న భారతదేశంలో మొట్టమొదటి చిత్ర పరిశ్రమగా తెలుగు చిత్ర పరిశ్రమ నిలిచింది. ఈ కార్యక్రమంలో టీఎఫ్‌సీసీ సెక్రటరీ కె. ఎల్ దామోదర్ ప్రసాద్, రామానాయుడు స్టూడియోస్ మేనేజింగ్ డైరెక్టర్ సురేష్ బాబు దగ్గుబాటి, అన్నపూర్ణ స్టూడియోస్ ఎగ్జిక్యూటివ్ డైరెక్టర్ సుప్రియ యార్లగడ్డ, యాంటీ వీడియో పైరసీ సెల్ టీఎఫ్‌సీసీ చైర్మన్ రాజ్‌కుమార్ ఆకెళ్ల, ఏవీపీసీ ఆపరేషన్స్ హెడ్ వై.మనీంద్ర పాల్గొన్నారు.
ఇటీవలి కాలంలో హైదరాబాద్ పోలీసులు డిజిటల్ పైరసీకి వ్యతిరేకంగా భారతదేశంలో అతిపెద్ద ఆపరేషన్లలో కొన్నింటిని నిర్వహించారు. పోలీసులు క్యామ్ కార్డింగ్ సిండికేట్‌లు అండ్ హెచ్ డి పైరసీ సిండికేట్‌లను ఛేదించి, భారతదేశం అంతటా అనేక మంది పైరేట్‌లను అరెస్టు చేశారు. మరీ ముఖ్యంగా హైదరాబాద్ సైబర్ క్రైమ్ పోలీసులు అక్రమ బెట్టింగ్ సైట్‌లు, పైరేట్‌ల మధ్య సంబంధాన్ని కంటెంట్ ఫ్లో పైప్ లైన్‌లలోని లోపాలు, లూప్ హోల్స్‌తో పాటు వెలుగులోకి తెచ్చారు. వారి అంతర్గత భద్రతా ప్రక్రియలను బలోపేతం చేయడం గురించి వాటాదారులను అప్రమత్తం చేశారు గత వారం అతిపెద్ద పైరసీ వెబ్‌సైట్‌లలో ఒకటైన ఐ బొమ్మపై చర్యలు తీసుకోవడం ముఖ్యమంత్రి రేవంత్ రెడ్డి నాయకత్వంలో పైరసీని ఎదుర్కోవడానికి.. సినిమా పరిశ్రమకు సహాయం చేయడానికి తెలంగాణ ప్రభుత్వం నిబద్ధతకు మరో నిదర్శనం. ముఖ్యమంత్రి అనుముల రేవంత్ రెడ్డి తీసుకొనుచున్న నిర్ణయాలు లేకుండా తెలంగాణ పోలీసులు పైన పేర్కొన్న కార్యకలాపాలు చేయడం సాధ్యం అయ్యేవి కావు.టీఎఫ్ సీసీ ఈ సదావకాశాన్ని తీసుకొని తెలుగు చలనచిత్ర పరిశ్రమ తరపున అనుముల రేవంత్ రెడ్డి గారికి మరోసారి కృతజ్ఞతలు తెలియజేస్తోంది. పైరసీని ఎదుర్కోవడానికి తెలుగు ఫిల్మ్ ఛాంబర్ ఆఫ్ కామర్స్ 2005లో ఏవీపీసీని స్థాపించింది. భారతదేశంలోని ఏ చిత్ర పరిశ్రమకైనా ఈ తరహా పరిశ్రమ నిర్వహణలో ఇది మొదటి సంస్థ. 2012లో, అప్పటి ముఖ్యమంత్రి కిరణ్ కుమార్ రెడ్డి సమక్షంలో మోషన్ పిక్చర్ అసోసియేషన్ ఆఫ్ అమెరికా (అన్ని ప్రధాన హాలీవుడ్ స్టూడియోల కన్సార్టియం)తో ఒక అవగాహన ఒప్పందంపై సంతకం చేసిన భారతదేశంలో మొట్టమొదటి చిత్ర పరిశ్రమగా తెలుగు ఫిల్మ్ ఇండస్ట్రీ నిలిచింది. ఇది హాలీవుడ్‌లోని భారతీయులకు.. ముఖ్యంగా తెలుగు చిత్రాలకు మార్గం సుగమం చేసింది. తరువాతి సంవత్సరాల్లో, ఉత్తర అమెరికాలో తెలుగు చిత్రాల మార్కెట్ గణనీయంగా పెరిగింది. సంబంధిత ప్రాంతాలలో ప్రపంచవ్యాప్తంగా తెలుగు – హాలీవుడ్ కంటెంట్ రక్షణ ప్రచారం కోసం తెలుగు ఫిల్మ్ ఇండస్ట్రీ మరియు ఎంపిఎ అనేక ఉమ్మడి కార్యకలాపాలను నిర్వహించాయి. జపాన్ ప్రభుత్వం యొక్క “మేధో సంపత్తి దేశంగా మారాలనే ప్రకటన”కు ప్రతిస్పందనగా, ఆర్థిక, వాణిజ్య పరిశ్రమ మంత్రిత్వ శాఖ సాంస్కృతిక వ్యవహారాల ఏజెన్సీ మద్దతుతో కంటెంట్ ఓవర్సీస్ డిస్ట్రిబ్యూషన్ అసోసియేషన్ 2002లో స్థాపించడం జరిగింది. జపనీస్ కంటెంట్ విదేశీ విస్తరణను ప్రోత్సహించడం.. పైరసీని ఎదుర్కోవడం లక్ష్యంగా సంగీతం, సినిమాలు, అనిమే, టీవీ కార్యక్రమాలు, ఆటలు, ప్రచురణ ఇతర రంగాల నుండి కంటెంట్ హోల్డర్లను ఒకచోట చేర్చింది.సీఓ డీఏలో 36 ప్రధాన జపనీస్ స్టూడియోలు 11 ప్రధాన సంస్థలు సభ్యులుగా ఉన్నాయి అని తెలుగు ఫిల్మ్ ఛాంబర్ ఆఫ్ కామర్స్ అధ్యక్షులు పి. భరత్ భూషణ్, గౌరవ కార్యదర్శులు కె. ఎల్. దామోదర్ ప్రసాద్, కె.శివ ప్రసాద రావు పేర్కొన్నారు.