పూజా హెగ్డే.. కీర్తి సురేష్..రష్మిక మందన్న
తెలుగు చిత్రసీమలో కథానాయికల గురించి చెప్పుకోవాలంటే ప్రస్తుతం మనం ముగ్గురి గురించే చెప్పుకోవాలి. ఆ ముగ్గురూ ఎవరో కాదు.. పూజా హెగ్డే.. రష్మిక మందన్న, కీర్తి సురేష్. వీళ్లు ముగ్గురూ..ముగ్గురే! తమ అందచందాలతో టాలీవుడ్ ని తమ వైపునకు తిప్పుకొని ఆధిపత్యాన్ని చెలాయిస్తూ నిర్మాతలకు చుక్కలు చూపిస్తున్నారు. ప్రస్తుతం ఈ ముగ్గురి భామల టైం నడుస్తుంది. ఈ ముగ్గురు ప్రస్తుతం టాలీవుడ్ ని కుదుపేస్తున్నారని చెప్పొచ్చు. అందులో ఎలాంటి సందేహం లేదు. వీరిలో పూజా హెగ్డే, రష్మిక మందన్నల జోరు అయితే మామూలుగా లేదు. వరుసగా సినిమాలు చేసేస్తూ తోటి తారలకు ముచ్చెమటలు పట్టేలా చేస్తున్నారు. అంతే కాదు.. అత్యధికంగా పారితోషికం తీసుకుంటున్నట్లుగా కూడా వార్తలు షికార్లు చేస్తున్నాయి. ఈ సమయంలో వీరిద్దరు కలిసి నటించబోతున్నారు అనే ప్రచారం ఇండస్ట్రీ వర్గాల ద్వారా వినిపిస్తుంది. ప్రతిష్టాత్మక వైజయంతి మూవీస్ వారు హను రాఘవపూడి దర్శకత్వంలో అన్ని సౌత్ భాషల ప్రేక్షకుల కోసం మలయాళ స్టార్ దుల్కర్ సల్మాన్ హీరోగా ఒక సినిమాను నిర్మించబోతున్నారు. ఈ సినిమా గురించి ప్రకటన వచ్చి చాలా రోజులు అయ్యింది. భారీ బడ్జెట్ తో దత్ గారి ఇద్దరు కూతుర్లు కూడా ఈ సినిమాను నిర్మిస్తున్నారు. ఈ సినిమా కోసం ఇద్దరు కథానాయికలను ఎంపిక చేయబోతున్నట్లుగా చాలా రోజులుగా వార్తలు వస్తున్నాయి. సాదారణంగా ఒక స్టార్ హీరోయిన్ ను ఎంపిక చేస్తే మరో చిన్న హీరోయిన్ ను ఎంపిక చేస్తారు. కానీ.. ఈ సినిమా కోసం మాత్రం ఇద్దరు స్టార్ హీరోయిన్ లను ఎంపిక చేశారు. వీరి పారితోషికం ఎక్కువ అయినా కూడా వీరిద్దరికి సౌత్ లో ఉన్న ఫాలోయింగ్ కారణంగా అన్ని భాషల్లో మంచి బిజినెస్ అవుతుందనే నమ్మకంను చాలా మంది వ్యక్తం చేస్తున్నారు. ఇక కీర్తి సురేష్ కూడా తనవంతూ స్టామినాను నిరూపించుకుంటూ కెరీర్ లో దూసుకెళుతోంది. తనకు నచ్చిన చిత్రాలు చేస్తూ తిరుగులేని తారగా విరా జిల్లుతోంది. ఇప్పుడు టాలీవుడ్ లో ఈ ముగ్గురిదే హవా!
