మహేష్ బాబు-రాజమౌళి కాంబినేషన్ లో రూపొందుతోన్న ‘వారణాసి’ చిత్రం అనౌన్స్మెంట్ కోసం నిర్వహించిన ‘గ్లోబ్ ట్రోటర్’ ఈవెంట్ గ్రాండ్ సక్సెస్ అయింది. టాలీవుడ్లోనే కాదు..ఇండియన్ సినిమా చరిత్రలో తొలిసారిగా ఒక సినిమాకి ఇలాంటి ఈవెంట్ నిర్వహించడం విశేషం. ఈ సందర్బంగా టైటిల్, మహేష్ బాబు లుక్తో పాటు అదిరిపోయే రేంజులో ఓ గ్లింప్స్ వదిలారు. ఈ గ్లింప్ వీడియోలో మహేష్ బాబు నంది పై ఎంట్రీ ఇస్తూ త్రిశూలం పట్టుకున్న లుక్ గూస్బంప్స్ తెప్పిస్తోంది. గ్రాఫిక్స్ షాట్లు, త్రీడీలో క్రియేట్ చేసిన విజువల్స్ చూస్తుంటే రెండు కళ్లు చాలడం లేదు. గ్లింప్స్లో ఎక్కడా డైలాగులు లేకపోయినా కీరవాణి తన మ్యూజిక్తో బాగా ఎలివేట్ చేశాడు. ఈ సినిమాలో ‘రామాయణం ఘట్టం’ కూడా ఉందని రాజమౌళి చెప్పారు. దాని వెనుక ఉన్న విజన్, మైథాలజికల్ అండ్ అడ్వెంచర్ ఎలిమెంట్స్ అన్నింటి సమ్మేళనం ద్వారా ఈ సినిమా అంతర్జాతీయ స్థాయిలో ఉంటుందని ఆయన మాటల ద్వారా తెలుస్తోంది. గ్లింప్స్ వీడియోలో రామాయణం ఘట్టానికి సంబంధించిన ఫ్లాష్లు కనిపించాయి. అసలు ఆ విజువల్స్ చూస్తుంటే జక్కన్న విజన్ ఏ రేంజులో ఉంటుందో తెలుస్తోందని సినీ విశ్లేషకులు అభిప్రాయపడుతున్నారు. ఈ వీడియో విడుదలైన వెంటనే సోషల్ మీడియా ట్రెండింగ్లోకి వెళ్లింది. మహేష్ బాబు ‘రుద్ర’ పాత్రలో కనిపించబోతున్నాడని ప్రకటిస్తూ ఎద్దుపై త్రిశూలం పట్టుకుని పవర్ఫుల్ ఎంట్రీ ఇచ్చే సీన్ ప్రత్యేకంగా ఆకట్టుకుంటోంది. అంతేకాదు మైథాలజికల్ టచ్, హాలీవుడ్ స్థాయి ఫ్రేమింగ్ కలిసి పాన్-వరల్డ్ క్లాస్ మూవీగా కనిపిస్తోంది. ఈ చిత్రంలో మహేష్ బాబు రుద్ర అనే పాత్రలో ప్రపంచ యాత్రికుడిగా, రాముడిగా ఆయన డిఫరెంట్ వేరియేషన్స్లో కనిపించనున్నారన్న వార్త అభిమానులకు గూస్బంప్స్ తెప్పిస్తోంది. ఇప్పటివరకు పౌరాణిక పాత్రల్లో కనిపించని మహేష్ బాబు తొలిసారి అలాంటి పాత్రలో నటించడం విశేషం. తన తండ్రి మాటను ఇన్నాళ్లకు నెరవేరుస్తున్నానని, ఇది తనకు డ్రీమ్ ప్రాజెక్ట్ అని ఆయన తన స్పీచ్లో ఎమోషనల్ అయ్యారు. ఇక ఇందులో 30 నిమిషాల పాటు ఉండే యాక్షన్ సీక్వెన్స్లలో మహేష్ బాబు విశ్వరూపం చూస్తారని విజయేంద్ర ప్రసాద్ చెప్పుకొచ్చారు. రాముడిగా మహేష్ బాబు ఎలా ఉండబొతున్నాడో రాజమౌళి తన స్పీచ్తో చెప్పేసి అందరికీ సర్ప్రైజ్ ఇచ్చారు. ఇలా ‘గ్లోబ్ ట్రోటర్’ ఈవెంట్లో వచ్చిన అప్డేట్స్తో మహేష్ ఫ్యాన్స్ సంబరపడిపోతున్నారు. సినిమా విడుదల కావడానికి ఇంకా ఏడాదిన్నర సమయం ఉండగా అప్పటివరకు ఈ స్టఫ్ సరిపోతుందని అభిమానులు అంటున్నారు.
మహేష్ బాబు-రాజమౌళిల ‘వారణాసి’ ప్రపంచం
