తెలుగు ప్రేక్ష‌కులకు… తెలుగు సినిమా బతికున్నంతకాలం… గుర్తుండిపోయే పేరు పద్మశ్రీ డాక్టర్ అల్లు రామ‌లింగ‌య్య. హాస్యం ఆయన కేరాఫ్ ఆడ్రస్‌, హాస్యానికే ప్రాణం పోసిన బ్ర‌హ్మ ఆయన.. అన్ని ర‌సాల్లో హస్యానికి పెద్దపీట వేశారు కాని ఏ పాత్ర‌నైనా అల‌ఓక‌గా చేసి చూపించిన గొప్ప న‌టుడు అల్లు రామ‌లింగ‌య్య. 1000 కి పైగా చిత్రాల్లో నటించి… తెలుగు సినిమా ప‌రిశ్ర‌మ‌కి మార్గదర్శకుడయ్యాడు. ఆయన తెర‌పై క‌నిపిస్తే పాత్ర క‌నిపిస్తుందికాని ఆయన క‌నిపించ‌రు. న‌ట‌న‌కి నిలువెత్తు రూపం అల్లు రామ‌లింగ‌య్య అంటే అతిశ‌యోక్తికాదు. తెలుగు సినిమా చరిత్రలో గ‌ర్వించ‌ద‌గ్గ గొప్ప క్లాసిక్స్ లో అల్లు రామ‌లింగ‌య్య పాత్రలు వుండ‌టం విశేషం.
హోమియోపతి డాక్టర్ గా ప‌లు సేవాకార్య‌క్ర‌మాలు అందించారు, త‌రువాత తెలుగు సినీ ప‌రిశ్ర‌మలో న‌టుడుగా ఎంత బిజీగా వున్నా కూడా త‌న వృత్తి హోమియోప‌తిని మాత్రం వ‌ద‌ల్లేదు. వీలున్న‌ప్పుడ‌ల్లా సినిమా న‌టీన‌టుల‌కి కూడా త‌న వైద్యాన్ని అందించారు. అల్లు రామ‌లింగ‌య్యకి ముగ్గురు కుమార్తెలు, ఒక కుమారుడు. అల్లు రామ‌లింగ‌య్య కుమారుడు అల్లు అర‌వింద్ నిర్మాత‌గా ఇండియాలోనే పేరుప్ర‌ఖ్యాత‌లు సాధించారు. ఆయన మ‌న‌వ‌డు అల్లు అర్జున్ తెలుగు వారి గుండెల్లో స్టైలిస్‌స్టార్ గా చెర‌గ‌ని స్థానం సంపాదించారు. తెలుగు సినిమా ప్ర‌తిష్టకి అల్లు ఫ్యామిలీ ఒక మూల‌స్థంభం అని చెప్పాలి. ఇంత‌టి ఘ‌న‌చ‌రిత్ర క‌లిగిన అల్లు రామ‌లింగ‌య్య జయంతి నేడు. 1 అక్టోబ‌ర్ 1922 న ఆయన జ‌న్మించారు. ఆయన ఈ సంవ‌త్స‌రంతో 99 సంవ‌త్స‌రాలు పూర్తిచేసుకుని 2021 సంవ‌త్స‌రంలో 100 సంవ‌త్స‌రాల మైల్ స్టోన్ లోకి అడుగుపెడతారు.
అయితే ఈ కార్య‌క్ర‌మాన్ని పురస్క‌రించుకుని కుమారుడు అల్లు అర‌వింద్, మ‌న‌వ‌ళ్ళు అల్లు వెంక‌టేష్, అల్లు అర్జున్ మ‌రియు అల్లు శిరీష్ లు.. అల్లు రామ‌లింగ‌య్య చిత్ర‌ప‌టానికి నివాళులు అర్పించారు, అలానే వీరంద‌రి నిర్వ‌హ‌ణలో అల్లు స్టూడియోస్ నిర్మాణానికి శ్రీకారం చుట్టారు. అల్లురామలింగ‌య్య వ్య‌వ‌స్ధాప‌కులుగా స్టాపించిన గీతాఆర్ట్స్ బ్యాన‌ర్లో గ‌త 48 సంవ‌త్స‌రాలుగా అనేక చిత్రాలు నిర్మించారు. ఇప్ప‌డు అల్లు వారు మ‌రో స్టెప్ ముందుకేసి అల్లు స్టూడియోస్ నిర్మాణానికి శ్రీకారం చుట్టారు. అల్లు స్టూడియోలో ఎలాంటి లేటెస్ట్ టెక్నాల‌జీ ఉండ‌బోతోంది, ఎలాంటి స‌దుపాయాలు ఉండ‌బోతోన్నాయి అనే విష‌యాలు త్వ‌ర‌లో తెలియ‌నున్నాయి.
