సొంత ఊరు, గంగపుత్రులు, ఒక రొమాంటిక్ క్రైమ్ కథ, గల్ఫ్, వలస వంటి చిత్రాలతో అవార్డులు, ప్రేక్షకుల రివార్డులు అందుకున్న డైరెక్టర్ పి. సునీల్ కుమార్ రెడ్డి రూపొందిస్తున్న తాజా చిత్రం “కాక్రోచ్”. ఈ చిత్రంలో అభిలాష్ సుంకర, ప్రేమసన్, నవీన్, తీర్థ ప్రధాన పాత్రల్లో నటిస్తున్నారు. “కాక్రోచ్” సినిమాను శ్రీ లక్ష్మి పిక్చర్స్ బ్యానర్ పై బి.బాపిరాజు, ముతుకి నాగసత్యనారాయణ నిర్మిస్తున్నారు.ఈ సినిమా మార్చి 6న గ్రాండ్ థియేట్రికల్ రిలీజ్ కు రాబోతోంది. ఈ రోజు జరిగిన ఇంటర్వ్యూలో మూవీ హైలైట్స్ తెలిపారు దర్శకుడు పి. సునీల్ కుమార్ రెడ్డి, నిర్మాత బి.బాపిరాజు.
నిర్మాత బి.బాపిరాజు మాట్లాడుతూ..
– నేను 70వ దశకంలో డిస్ట్రిబ్యూటర్ గా కెరీర్ స్టార్ట్ చేశాను. తమిళ సినిమాలను కొని తెలుగులో రిలీజ్ చేసేవాళ్లం. అప్పుడు డబ్బింగ్ ద్వారానే ఇతర చిత్రాలను ప్రేక్షకులు చూడగలిగేవారు. అలా చాలా సినిమాలు డిస్ట్రిబ్యూషన్ చేశాను. కొన్నాళ్లకు పి.సునీల్ కుమార్ రెడ్డి గారితో పరిచయం ఏర్పడింది. స్వర్గీయ రవీంద్రబాబు గారితో కలిసి సునీల్ కుమార్ రెడ్డి గారి కాంబినేషన్ లో వరుసగా చిత్రాలు చేస్తూ వచ్చాం. ఈ సినిమాలన్నీ మాకు నిర్మాతలుగా మంచి పేరు తీసుకొచ్చాయి.
– మా కాంబినేషన్ లో చేస్తున్న మరో వినూత్న సినిమా “కాక్రోచ్”. ఎవరూ కావాలని తప్పులు చేయరు. ఆకలి, నిరుద్యోగం, పేదరికం వారితో తప్పులు చేయిస్తాయి. సమాజంలో వేల కోట్ల రూపాయలు ఉన్న ధనవంతులు ఉంటారు. వారిలో కొందరు రూపాయి సాయం చేయరు. పని దొరకని యువత విధిలేని పరిస్థితుల్లో తప్పుదారిలో వెళ్తుంటారు. పొట్ట కూటికోసం కొందరు మహిళలు వ్యభిచార వృత్తిలోకి వస్తుంటారు. అలాంటి కొందరు క్రిమినల్స్, వేశ్య మధ్య సాగిన ప్రేమ కథ ఈ సినిమాకు నేపథ్యం. ఈ కథను వీలైనంత బోల్డ్ గా తెరకెక్కించారు మా దర్శకుడు సునీల్ కుమార్ రెడ్డి.
– సమాజంలో జరుగుతున్న ఘటనలకు వాస్తవిక రూపంగా ఈ సినిమాను నిర్మించాం. తన పేదరికమే శాపమై వ్యభిచార వృత్తిలోకి వచ్చే వేశ్య కొద్దిపాటి ఆదాయం కోసం ఎన్నో బాధలు పడుతుంది. ఈ సమాజం డబ్బున్న వారిని ఒకలా, లేని వారిని మరోలా చూస్తుంది. పేదలకు న్యాయం కూడా దక్కదు. ఇలాంటి అంశాలన్నీ మా మూవీలో ఆకట్టుకునేలా, మనసును కదిలించేలా హార్డ్ హిట్టింగ్ గా చూపించారు మా డైరెక్టర్. ఈ నెల 6న మా “కాక్రోచ్” సినిమాను విడుదల చేస్తున్నాం. రియల్ లైఫ్ స్టోరీని రా అండ్ రస్టిక్ మేకింగ్ తో చూడాలనుకునే ప్రేక్షకులకు మా మూవీ బాగా నచ్చుతుంది.
డైరెక్టర్ పి.సునీల్ కుమార్ రెడ్డి మాట్లాడుతూ …
– నేను విశాఖలో జర్నలిస్ట్ గా పనిచేశాను. సొంతంగా ఒక పత్రిక నిర్వహించాను. వార్తల సేకరణలో భాగంగా పోలీసులు, నేరస్తులతో మాట్లాడుతుండేవాడిని. ఈ క్రమంలో వారు చెప్పే విషయాలు ఎంతో ఆసక్తిని కలిగిస్తుండేవి. కొందరు పోలీసులు, నేరస్తులతో కలిసి నేరాలు చేసేవారు. అలాంటివన్నీ విన్న తర్వాత ఈ నేపథ్యంతో సినిమా రూపొందిస్తే బాగుంటుంది అనిపించింది. మన నేరస్తుల గురించి ఒక అభిప్రాయం ఏర్పర్చుకుని ఉంటాం. కానీ వాళ్ల జీవితాలను దగ్గరగా చూశాక నా అభిప్రాయం పూర్తిగా మారిపోయింది. వాళ్లలో కొందరు ఉన్నత స్థాయికి వెళ్లాలని కలగన్న వారున్నారు. డాక్టర్ చదివి వైద్య సేవ చేయాలనుకునే వారూ ఉన్నారు. వాళ్ల కుటుంబాల్లో, వ్యక్తిగత జీవితాల్లో జరిగిన అనేక సంఘటనల వల్ల అనుకున్న దారిలో వెళ్లలేక క్రిమినల్స్ గా మారారు.
– మన సినిమాల్లో సమాజంలో ఉండే పువ్వుల్లాంటి జీవితాలే చూపించారు. కానీ మొక్క దగ్గర ఉండే మట్టిని, పువ్వు చుట్టూ ఉండే ముల్లు లాంటి జీవితాలను ఎవరూ తెరకెక్కించలేదు. “కాక్రోచ్” సినిమాతో నేను ఆ ప్రయత్నం చేశాను. నేను గతంలో చేసిన చిత్రాలు గంగపుత్రులు, సొంతఊరు వంటివి కూడా రెగ్యులర్ సినిమా నేపథ్యాలకు భిన్నంగా ఉన్నవే. కొందరు నేరస్తులు, వేశ్య మధ్య జరిగిన ప్రమే కథతో ఈ సినిమాను బోల్డ్ గా, హార్డ్ హిట్టింగ్ గా రూపొందించాను. ఈ సినిమా పిల్లలకు, సున్నిత మనస్కులకు కాదని ప్రచార కార్యక్రమాల్లోనే స్పష్టంగా చెబుతున్నాం. సెన్సార్ వారికి కూడా మాకు ఎ సర్టిఫికెట్ కావాలనే చెప్పాం. మా మూవీ రివైజింగ్ కమిటీకి వెళ్లిన తర్వాత ఈ సినిమా తీయడంలో నా దృక్పథం ఏంటో క్లియర్ గా చెప్పాను. ఒక ఉన్నత స్థాయి వృత్తిలో ఉన్నవారు తమ వృత్తి గురించి గర్వంగా చెప్పుకున్నట్లే వేశ్య వృత్తిలో ఉన్న మహిళ తన ప్రొఫెషన్ గురించి గర్వంగానే చెప్పుకుంటుంది. నా వివరణ తర్వాత సెన్సార్ వారు అంగీకరించి ఎ సర్టిఫికెట్ జారీ చేశారు.
– మా మూవీలోని పాత్రలు ఎమోషనల్ గానే కాదు ఫిజికల్ గా కూడా స్ట్రాంగ్ గా ఉండాలి. అందుకే నటీనటుల ఎంపిక జాగ్రత్తగా చేశాం. ఫైటర్స్ అసోసియేషన్ నుంచి కొందరిని ఎంపిక చేసి మా మూవీలోని క్రిమినల్స్ పాత్రలకు తీసుకున్నాం. జీవితంలో ఏం జరిగినా చలించరు అనేలా వారు కనిపిస్తారు. ఈ క్యారెక్టర్స్ బ్యాక్ స్టోరీ కూడా మూవీలో మిళితమై ఉంటుంది. డార్క్ బ్యాక్ డ్రాప్ లో సాగే ఈ చిత్రం రెగ్యులర్ సినిమాలకు భిన్నంగా ఉంటుంది. మనకు తెలియని ఒక ప్రపంచాన్ని పరిచయం చేస్తుంది. ఇలాంటి రియలెస్టిక్ సినిమాలు కూడా చూసి ఆదరించే ప్రేక్షకులు ఉంటారని నమ్ముతున్నాం. ఈ మూవీని బోల్డ్ గా రూపొందించాం. నేను చూసిన సమాజాన్ని ఉన్నది ఉన్నట్లు చూపించే ప్రయత్నం చేశాను.
– చిన్న చిత్రాలు ఆదరణ పొందవు అని అనుకున్న టైమ్ లో ఏదో ఒక మూవీ సక్సెస్ అయ్యి మళ్లీ మా లాంటి మేకర్స్ కు హోప్ ఇస్తుంటుంది. నేను ఇండస్ట్రీకి వచ్చినప్పుడు కొత్త ఫిలింమేకర్స్ కు పెద్దగా ప్రోత్సాహం, అవకాశం ఉండేది కాదు. ఈ రోజు కొత్త మేకర్స్ ఎలాంటి కంటెంట్ అయినా చెప్పే స్వేచ్ఛ, టెక్నికల్ సపోర్ట్ ఉంది. ఒకప్పుడు ఎడిటింగ్ రూమ్ లోకి వెళ్లనివ్వని పరిస్థితి ఉండేది. ఇప్పుడు నా ఆఫీస్ నుంచే సినిమాను రెడీ చేసి థియేటర్ కు పంపేంత టెక్నాలజీ వచ్చింది.
– సినిమాల మేకింగ్ సులువైంది. కానీ దాన్ని ప్రేక్షకుడికి చేర్చి, ప్రేక్షకుడిని థియేటర్ కు రప్పించడం పెద్ద టాస్క్ గా మారింది. టెక్నాలజీ అందుబాటులో ఉండటంతో విరివిగా సినిమాలు తెరకెక్కిస్తున్నారు. మరోవైపు ప్రేక్షకుడికి ఓటీటీ సహా ఎన్నో ఎంటర్ టైన్ మెంట్ ఆప్షన్స్ వచ్చాయి. దాంతో చిన్న చిత్రాలకు ఆడియెన్ ను రప్పిచండం చాలా కష్టంగా మారింది. మన సినిమా టార్గెట్ ఆడియెన్ ఎవరు అనేది చూసుకుని ఆ సెంటర్స్ లోనే సినిమాను రిలీజ్ చేసుకోవాలి.
– మాకున్న అనుభవంతో మూవీ మేకింగ్ టైమ్ నుంచే నేల మీద ఉన్నాం. ఎక్కడా అసాధ్యమైన అంచనాలు పెట్టుకోకుండా రియలిస్టిక్ గా మూవీ రూపొందించాం. ప్రస్తుతం మలయాళంలో ఒక మూవీ చేశాను. చదలవాడ శ్రీనివాసరావు గారికి ఒక సినిమా చేశాను. అది రిలీజ్ కు రెడీగా ఉంది. బాలీవుడ్ లో సల్మాన్ ఖాన్ సోదరుడి అర్బాజ్ ఖాన్ తో ఒక సినిమాకు వర్క్ చేశాను.
