ప్రముఖ నటులు బాలయ్య ఈ రోజు (శనివారం) ఉదయం కన్నుమూశారు. ఆయన వయసు 94 సంవత్సరాలు. హైదరాబాద్ యూసఫ్ గూడలోని తన స్వగృహంలో శ్రీ బాలయ్య తుదిశ్వాస విడిచారు. నటుడిగా 300కిపైగా చిత్రాల్లో నటించారు. ఎత్తుకు పైఎత్తు చిత్రంతో నటుడు అయ్యారు. నిర్మాతగా, దర్శకుడుగా, కథా రచయితగా తన ప్రతిభ చూపారు. ఆయన నిర్మాతగా అమృత ఫిల్మ్స్ సంస్థ ద్వారా చెల్లెలి కాపురం (శోభన్ బాబు హీరో) నేరము – శిక్ష (కృష్ణ హీరో. కె. విశ్వనాథ్ దర్శకుడు) చుట్టాలున్నారు జాగ్రత్త, ఊరికిచ్చిన మాట (చిరంజీవి హీరో) లాంటి చిత్రాలు శ్రీ బాలయ్య నిర్మించారు. దర్శకుడుగా పసుపు తాడు, నిజం చెబితే నేరమా, పోలీసు అల్లుడు రూపొందించారు. ఉత్తమ కథా రచయితగా ఊరికిచ్చిన మాట చిత్రానికి నంది అవార్డు అందుకున్నారు. చెల్లెలి కాపురం చిత్రానికి నిర్మాతగా నంది అవార్డు అందుకున్నారు. శ్రీ బాలయ్య కుమారుడు తులసీరామ్ కూడా కొన్ని చిత్రాల్లో కథానాయకుడిగా నటించారు.
శివుడంటే బాలయ్య: శ్రీరామ, శ్రీకృష్ణ పాత్రలంటే ఎన్టీఆర్‌ ఎలా గుర్తుకు వస్తారో సినిమాలో శివుడు పాత్ర అనగానే బాలయ్య గుర్తుకు వస్తారు. మిగిలిన నటుల కంటే అత్యధికంగా అంటే పదికి పైగా చిత్రాల్లో బాలయ్య శివుడి పాత్రల్లో నటించారు. ఆయన తొలిసారిగా 1962లో వచ్చిన ‘పార్వతీ కళ్యాణం’ చిత్రంలో శివుడి పాత్రలో కనిపించారు. ఆ చిత్రంలో ఆయన నిజమైన పామునే ఆయన మెడలో వేసుకుని నటించారు.
ఆ తర్వాత ‘మల్లమ్మ కథ, ‘భక్త కన్నప్ప, ‘మోహినీ రుక్మాంగద’, ‘మనోరమ’, ‘జగన్మాత’, ‘అష్టలక్ష్మీ వైభవం’ తదితర చిత్రాల్లో శివుడిగా నటించి మెప్పించారు. అలాగే ‘కృష్ణ ప్రేమ’ చిత్రంలో శ్రీకృష్ణుడిగా బాలయ్య కనిపించారు. కృష్ణుడు అంటే ఎన్టీఆరే అని అందరూ ఫిక్స్‌ అయిన తరుణంలో ఆ పాత్ర పోషించడానికి బాలయ్య భయపడ్డారు. కానీ దర్శకుడు ఆదుర్తి సుబ్బారావు ధైర్యం చెప్పి ఆయనతో ఆ వేషం వేయించారు.
సీనియర్ నటుడు బాలయ్య శనివారం ఉదయం తుదిశ్వాస విడిచిన సంగతి తెలిసిందే!బాలయ్య దాదాపు 300 లు చిత్రాలలో విభిన్న పాత్రలతో అలరించిన ఆయన నంది అవార్డుతో పాటు రఘుపతి వెంకయ్య అవార్డును కూడా అందుకున్నారు. బాలయ్య మరణవార్త విన్న సినీ ప్రముఖులు ఆయన ఆత్మకు శాంతి కలగాలని సంతాపం తెలిపారు.
శివుడంటే బాలయ్య : సీనియర్ నటులు బాలయ్య ఇకలేరు!!
