- -రసవత్తర పోరులో ‘నేను సైతం.. ‘ అంటూ స్వతంత్ర అభ్యర్థిగా రంగంలో మధు వింజమూరి
- -ఈసీ మెంబెర్ గా సీరియల్ నెం -31కి విలువైన ఓటు వేసి గెలిపించాలని అభ్యర్థన
- ‘మా’ కోసం-మనకోసం’ మనమే అంటూ బరిలో ముందంజ
అక్టోబర్‌ 10న జరగనున్న మూవీ ఆర్టిస్ట్స్ అసోసియేషన్ (మా) ఎన్నికల ప్రచారం ఊపందుకుంది. ఎన్నడూ ‘మా’ ఎన్నికల్లో ఇలాంటి ఊపును చూడలేదు. ఇప్పుడు అందరి దృష్టి ‘మా’ ఎన్నికలపైనే ఉంది. ‘మా’ (మూవీ ఆర్టిస్ట్స్ అసోసియేషన్) ఎన్నికల వ్యవహారం వాడి-వేడిగా రోజు రోజుకూ తీవ్రంగా వేడెక్కుతోంది. అధ్యక్ష పదవికి ప్రకాష్ రాజ్, మంచు విష్ణు ఇద్దరూ నువ్వా నేనా? అన్నట్టుగా పోటీ పడుతున్నారు. దీంతో ఈ ఎన్నికల్లో ఎవరు గెలుస్తారు అనేది ఉత్కంఠగా మారింది. ప్రకాష్ రాజ్ ప్యానల్ సభ్యులు, మంచు విష్ణు ప్యానల్ సభ్యులు ఎవరికివారే తమను గెలిపించమని తమదైన పంథాలో ప్రచార కార్యక్రమాన్ని ముమ్మరం చేశారు. అయితే ఇంతటి రసవత్తర పోరులో ‘నేను సైతం.. ‘ అంటూ ఓ అభ్యర్థి రంగంలో ఉన్నారు. అదీ ఈసీ మెంబెర్ గా నిలబడి అందర్నీ ఆకర్షిస్తున్నారు. ఆ అభ్యర్థే నటుడు, నిర్మాత మధు వింజమూరి. ‘మా’ కోసం-మనకోసం’ అంటూ బరిలో తనకంటూ ఏర్పాటు చేసుకున్న ఓ ప్రత్యేకమైన రూటులోనే పయనిస్తూ ‘మా’ సభ్యుల్ని కలుసుకుంటూ ఈ ఎన్నికల్లో సీరియల్ నెం -31కి మీ విలువైన ఓటు చేసి ఈసీ మెంబెర్ గా గెలిపించాలని అభ్యర్థిస్తున్నారు. అధ్యక్ష పదవికి ప్రకాష్ రాజ్, మంచు విష్ణు ఇద్దరూ నువ్వా నేనా? అన్నట్టుగా రీతిలో పోటీ పడుతున్నారు. వీరిద్దరి మధ్య ఏర్పడిన పోటీతో ‘మా’ ఎన్నికలు రాజకీయ ఎన్నికలను తలపిస్తున్నాయి. సినీ ప్రముఖులే కాకుండా.. సామాన్యులు సైతం మా ఎన్నికల గురించి ఆసక్తిగా ఎదురు చూస్తున్నారు. ఎవరెన్ని చెప్పినా ‘మా’ కోసం ఏం చేయాలనే విషయం పై పక్కాగా ప్రణాళికలు ఉన్నఅభ్యర్థులే ఈ ఎన్నికల్లో విజయం సాధిస్తారని, ‘మా’ కోసం మన కోసం మనమే ముందుండాలని, స్వతంత్ర అభ్యర్థిగా నిలబడితేనే మనకంటూ ఓ ప్రత్యేకత కలిగిఉంటామని నిర్మాత మధు వింజమూరి అంటున్నారు. గెలుపుపై ఎవరిధీమా వారిదే అయితే.. ఈ సమరం ‘మా’ కూ ఓ సవాలుగానే నిలిచింది. ప్రకాశ్‌ రాజ్ – మంచు విష్ణు ఇద్దరూ ఎన్నికల ప్రచారాన్ని వినూత్నంగా ప్రారంభించి అందరి దృష్టిని తమవైపునకు తిప్పుకున్నారు. కాగా ప్రచారంలో భాగంగా ప్రకాశ్‌ రాజ్ సోషల్‌ మీడియా వేదికగా తమకే ఓటు వేయాలని కోరిన సంగతి తెలిసిందే. తమ ప్యానల్ సభ్యులతో ఉన్న పాంప్లెట్‌ ఫొటోను షేర్‌ చేస్తూ.. మీ ఓటే మీ గొంతు.. ‘మా’ హితమే మా అభిమతం.. మనస్సాక్షిగా ఓటేద్దాం.. ‘మా’ ఆశయాలను గెలిపిద్దాం..’ అంటూ ట్వీట్‌ చేశాడు. ఈ ట్వీట్‌ వైరల్‌గా మారింది. మంచు విష్ణు సైతం తనదైన పంథాలోనే పావులు కదుపుతున్నారు. అయితే.. ‘మా’ ఎన్నికల్లో గెలుపు ఎవరిదైనా విజయ సారథులకు అందరూ అభినందనలు చెబుదాం అంటున్నారు నటుడు, నిర్మాత మధు వింజమూరి.
