యంగ్ రెబల్ స్టార్ ప్రభాస్ ‘రాధే శ్యామ్’ విడుదల తేదీ సమీపిస్తున్న కొద్దీ కొత్తగా ప్రమోషన్స్ ప్లాన్ చేస్తున్నారు మేకర్స్. ఇప్పుడు తాజాగా వాలెంటైన్ వీక్ రావడంతో సినిమా ప్రమోషన్ మరింత ఆసక్తికరంగా చేయబోతున్నారట. సౌత్ ఇండస్ట్రీలోనే మొదటి సారిగా ఈ సినిమా కోసం థీమ్ పార్టీ చేయబోతున్నారని సమాచారం. ప్రభాస్, పూజా హెగ్డే జంటగా రాధాకృష్ణ కుమార్ దర్శకత్వంలో తెరకెక్కుతున్న ఈ క్యూట్ లవ్ స్టోరీపై అంచనాలు భారీగా ఉన్నాయి. వాటిని ఇంకా పెంచేస్తూ కొత్త పార్టీ ఏర్పాటు చేయబోతున్నారు‘రాధే శ్యామ్’ చిత్ర యూనిట్. ఫిబ్రవరి 14 రాత్రి 8 గంటల నుంచి హైదరాబాద్ కెమిస్ట్రీ క్లబ్బులో ఈ పార్టీ మొదలు కానుంది. దీనికోసం ప్రత్యేకంగా సెట్ కూడా వేస్తున్నారు. ఈ థీమ్ పార్టీకి యూనిట్ అంతా హాజరు కానున్నారు. విధికి, విధిరాతకు మధ్య జరిగే సంఘర్షణ ఈ సినిమా కథ. మార్చి 11న ప్రపంచ వ్యాప్తంగా తెలుగుతో పాటు హిందీ, తమిళ, మలయాళ, కన్నడ భాషల్లో ఒకే రోజు విడుదల కానుంది. ఇండస్ట్రీలలో రాధే శ్యామ్‌పై అంచనాలు భారీగా ఉన్నాయి. తాజాగా ఈ సినిమా గురించి సంగీత దర్శకుడు తమన్ చేసిన వ్యాఖ్యలు సినిమాపై అంచనాలు మరింత పెంచేసాయి. రాధే శ్యామ్ సినిమాకు ఆయన నేపథ్య సంగీతం అందించారు. ఈ సందర్భంగా సినిమా గురించి మాట్లాడుతూ ఎమోషనల్ అయ్యారు తమన్. సినిమా చూస్తున్నప్పుడు ఒక తెలియని ట్రాన్స్ లోకి వెళ్లిపోయానని.. చాలా రోజుల తర్వాత ఒక అద్భుతమైన ప్రేమ కథ చూసిన ఫీలింగ్ కలిగింది అంటున్నారు ఈయన. రేపు సినిమా విడుదలైన తర్వాత ప్రేక్షకులకు కూడా ఇదే ఫీలింగ్ కలుగుతోందని.. నిజమైన ప్రేమ ఎక్కడ ఉంటే అక్కడ ‘రాధే శ్యామ్’ సినిమా కూడా ఉన్నట్లే అంటున్నారు ఈ సెన్సేషనల్ మ్యూజిక్ డైరెక్టర్.
ఫిబ్రవరి 14 వాలెంటైన్స్ డే రోజు ‘రాధే శ్యామ్’ పార్టీ
