ఉత్తర అమెరికా తెలుగు సంఘం, తానా ప్రపంచ సాహిత్య వేదిక “ఆజాదీకా అమృత మహోత్సవ్” ఉత్సవాలు పురస్కరించుకుని పలు సామాజిక అంశాలపై ప్రతిష్ఠాత్మకంగా “అంతర్జాతీయ కవితల పోటీలు” నిర్వహించింది. ఈ పోటీలో యాదాద్రి భువనగిరి జిల్లా ఆలేరు పట్టణానికి చెందిన కవి బండిరాజుల శంకర్ ఎంపికయ్యారు. ఏప్రిల్ 23 న భారత కాలమానం ప్రకారం సాయంత్రం 7.30 గంటలకు జూమ్ లో తానా నిర్వహించబోతున్న ప్రపంచస్థాయి కవితా వేదిక మీద బండిరాజుల శంకర్ తమ కవితను వినిపించబోతున్నారు. భారత దేశ ఉనికిని చాటి చెబుతూ భావయుక్తంగా వారు రాసిన ‘మానవత్వం నా ఉనికి’ అనే కవిత ఈ పోటీలో ఎంపికయింది. ఇంతటి విశేషమైన కార్యక్రమంలో ఎంపిక చేసి, అంతర్జాతీయంగా పరిచయం చేస్తున్నందుకు తానా అధ్యక్షులు అంజయ్య చౌదరి రావు, తానా ప్రపంచ సాహిత్య వేదిక సమన్వయకర్త చిగురుమళ్ళ శ్రీనివాస్, ప్రపంచ సాహిత్య వేదిక నిర్వాహకులు డాక్టర్ ప్రసాద్ తోటకూర గారికి ఆయన ధన్యవాదాలు తెలియజేశారు. అనేకమంది దేశ, విదేశ తెలుగు కవులు, ప్రముఖులు హాజరయ్యే ఈ ‘తానా కవితాలహరి’ కార్యక్రమం తానా అధికారిక యూట్యూబ్ ఛానల్, ఫేస్బుక్ ఛానల్లో ప్రత్యక్ష ప్రసారం చేయబడుతుంది. ‘యప్ టీవీ’ ద్వారా అమెరికాతో పాటు, యూరప్ దేశాలలో ప్రత్యక్ష ప్రసారం చేయబడుతుంది. ఈ టీవీ భారత్, మన టీవీ, టీవీ ఆసియా తెలుగు మరియు ఇతర మాద్యమాలలో ప్రసారం కానుంది.సరళమైన భాషలో, సామాజిక అభ్యుదయాన్ని కాంక్షిస్తూ రచనలు చేసే శంకర్ గారు 120 పద్యాలతో “స్వామి వివేకానంద సూక్తిశతి” అనే శతకాన్ని రచించి విడుదల చేశారు. ఆలేరులో శ్రీ రామకృష్ణ విద్యాలయం నిర్వాహకులుగా ప్రజల, ప్రభుత్వ ప్రశంశలతో పాటు జిల్లా, రాష్ట్రస్థాయి అవార్డులను ఎందరో ప్రముఖుల ప్రశంసలను అందుకున్నారు. వృత్తి రీత్యా వీరు ఉపాధ్యాయులు. బుఱ్ఱకథలను రాస్తారు, గానం చేస్తారు. పాటలు రాస్తారు.
బండిరాజుల శంకర్ గారికి అబ్దుల్ అభినందనలు
ఆలేరు ఖ్యాతిని తన కవితతో తానా ద్వారా ప్రపంచ స్థాయికి తీసుకు వెళ్లిన శ్రీ బండిరాజుల శంకర్ గారిని ఆలేరుకు చెందిన సీనియర్ జర్నలిస్ట్ , నంది అవార్డు గ్రహిత, ఫిలిం క్రిటిక్స్ అసోసియేషన్ జాయింట్ సెక్రటరీ ఎం.డి అబ్దుల్, సీనియర్ జర్నలిస్ట్ తిరునగరి శ్రీనివాస్ తదితరులు అభినందనలు తెలిపారు.
అంతర్జాతీయ కవి సమ్మేళనానికి బండిరాజుల శంకర్ ఎంపిక
