సీనియర్ నటుడు గిరిబాబు మృతి

టాలీవుడ్ ఇండస్ట్రీలో తీవ్ర విషాదం చోటుచేసుకుంది. హీరోగా, విలన్ గా, కేరెక్టర్ యాక్టర్ గా, కమెడియన్ గా వందలాది చిత్రాల్లో విలక్షణమైన పాత్రలు పోషించిన సీనియర్ నటుడు గిరిబాబు(82) మృతి చెందారు. గత కొంతకాలంగా వయో వృద్ధాప్య సమస్యలతో పోరాడుతున్న ఆయన శనివారం కన్నుమూశారు. ఆయన మరణవార్తతో ఇండస్ట్రీలో తీవ్ర విషాద ఛాయలు నెలకొన్నాయి. వందలాది చిత్రాల్లో తనదైన అభినయంతో ఆకట్టుకున్నారు గిరిబాబు. ఆయన అసలు పేరు యర్రా శేషగిరిరావు. గిరిబాబుకు చదువుకొనే రోజుల నుంచే నటనాభిలాష ఉండేది. యన్టీఆర్, ఏయన్నార్ చిత్రాలు చూసి వారిలాగా అభినయిస్తూండేవారు. తరువాత నాటకాల్లో నటించారు. అదే ఆసక్తితో చిత్రసీమలోనూ ప్రవేశించారు. 1973లో రూపొందిన ‘జగమే మాయ’ చిత్రం ద్వారా నటునిగా పరిచయమయ్యారు గిరిబాబు. తరువాత ‘వధూవరులు’ వంటి కొన్ని సినిమాల్లో హీరోగానూ నటించారు. అయితే కథానాయకునిగా గిరిబాబు సక్సెస్ సాధించలేదు. దాంతో విలన్ వేషాల్లో రాణిస్తూ ముందుకు సాగారు. గిరిబాబు వందలాది చిత్రాల్లో నటించినా, ఆయనలోని అసలైన నటుణ్ణి తరువాతి తరం దర్శకులే పసికట్టారు. అలా కేరెక్టర్ యాక్టర్ గా మారి అనేక చిత్రాల్లో ఆకట్టుకున్నారు. గిరిబాబు విలన్ వేషాలు వేసి జనాన్ని భయపెట్టినా, తరువాతి రోజుల్లో కేరెక్టర్ రోల్స్ లో ప్రేక్షకులకు దగ్గరయ్యారు. ఓ తరం నటీనటులకు తండ్రి పాత్రల్లో గిరిబాబు భలేగా మెప్పించారు. ఇక గిరిబాబు కమెడియన్ గా, కామెడీ విలన్ గానూ అలరించారు. గిరిబాబు తనయుడు రఘుబాబు సైతం తండ్రి బాటలో పయనిస్తూ చిత్రసీమలో సాగుతున్నారు. గిరిబాబు నటునిగానే కాదు జయభేరి పతాకంపై నిర్మాతగా, రచయితగా, దర్శకునిగానూ సాగారు. గిరిబాబు నిర్మించి, నటించిన ‘దేవతలారా దీవించండి, సింహగర్జన, మెరుపుదాడి, రణరంగం’ చిత్రాలు ఆదరణ పొందాయి. ‘రణరంగం’ చిత్రంతో దర్శకుడైన గిరిబాబు తరువాత ‘నీ సుఖమే నే కోరుతున్నా’ వంటి సినిమానూ రూపొందించారు. గిరిబాబు, మురళీమోహన్ మంచి మిత్రులు… ఇద్దరూ ‘జగమేమాయ’తోనే చిత్రసీమకు పరిచయమయ్యారు. గిరిబాబు నెలకొల్పిన జయభేరి బ్యానర్ ను తరువాత మురళీమోహన్ తీసుకున్నారు. అప్పటి నుంచీ మురళీమోహన్ సొంత చిత్రాల్లో గిరిబాబు తప్పనిసరిగా కనిపించేవారు. సదరు చిత్రాల్లో మురళీమోహన్ నటించకున్నా, గిరిబాబు తప్పకుండా ఉండేవారు. చిత్రసీమలో తనకంటూ ఓ ప్రత్యేక స్థానం సంపాదించుకున్నారు గిరిబాబు. ఇక సోషల్ మీడియా వేదికగా ఆయన ఆత్మకు శాంతి చేకూరాలని పలువురు సినీప్రముఖులు సంతాపం వ్యక్తం చేస్తున్నారు. హీరో కావాలనే కలతో అసలు పేరు శేషారావుతో సినిమా అవకాశాల కోసం ప్రయత్నించిన గిరిబాబుకు తొలి మూడు సినిమాల్లోనూ నిరాశే ఎదురైంది. చివరకు 1973లో ‘జగమే మాయ’తో వెండితెరకు పరిచయమై నటుడిగా, దర్శకుడిగా, నిర్మాతగా ప్రత్యేక గుర్తింపు తెచ్చుకున్నారు. 83 ఏళ్ల వయసులో ఆయన కన్నుమూశారు. కొత్తవాళ్ళకు సినిమా రంగం అనేది వడ్డించిన విస్తరి ఎంత మాత్రంకాదు. సినిమా రంగంలో ఐదారు దశాబ్దాల పాటు పాతుకుపోయారంటే… వాళ్ళకు ఎంతో అనుభవం ఉండి ఉండాలి. అలానే సినిమానే శ్వాసగా భావించి అయినా ఉండాలి. నవంబర్‌ 14న సికింద్రాబాద్‌ కిమ్స్ లో అనారోగ్యంతో కన్నుమూసిన ప్రముఖ నటుడు, దర్శక నిర్మాత గిరిబాబు కూడా అందుకు మినహాయింపు కాదు. సినిమాల్లోకి రావాలని, హీరోగా నటించాలని ఎన్నో కలలు కన్నారు. ఆయనకంటే ఆయన స్నేహితులు ఎంతగానే ప్రోత్సహించారు. గిరిబాబు తొలి రోజుల్లో తన అసలు పేరు (శేషారావు) తోనే సినిమా అవకాశాల కోసం తిరిగారు. సినిమా కంపెనీలకు ఫోటోలు పంపి వారి నుంచి వచ్చే కబురు కోసం ఎదురుచూస్తున్న శేషారావుకు ఓసారి నిజంగానే సమాచారం వచ్చింది. దాంతో 1966 డిసెంబర్ 31న బయలుదేరి 1967 జనవరి 1న శేషారావు మద్రాసులో రైలు దిగారు. ఎస్.డి. లాల్‌ దగ్గర అసోసియేట్‌ గా పనిచేసే సిద్ధ లింగయ్య ఆ సినిమాకు దర్శకుడు కాగా పాండు అనే ఆయన నిర్మాత. ఆ సినిమా పేరు ‘ధైర్యే సాహసే లక్ష్మి’. సినిమాటోగ్రాఫర్‌ పి.ఎస్. ప్రకాశ్‌ కూ అదే మొదటి సినిమా. దర్శకుడు, ఛాయాగ్రాహకుడు కలిసి గిరిబాబును ఇంటర్వ్యూ చేశారు. హీరోగా ఎంపిక చేశారు. సినిమా ప్రీ ప్రొడక్షన్ వర్క్ సైతం సూపర్ గా సాగింది. కానీ నిర్మాత పాండుకు ఆర్థికంగా సాయం చేస్తామని హామి ఇచ్చిన వారు జారుకోవడంతో ‘ధైర్యే సాహసే లక్ష్మీ’ సినిమా పట్టాలెక్కలేదు. అలా గిరిబాబు హీరోగా నటించాల్సిన మొదటి సినిమా తప్పిపోయింది. రెండో సినిమాది మరో కథ. ప్రముఖ నటి, దర్శకురాలు జి. వరలక్ష్మి, రాజ్‌ కుమార్ అనే యువకుడిని హీరోగా పరిచయం చేస్తూ ‘మూగజీవులు’ అనే సినిమాను స్వీయ దర్శకత్వంలో నిర్మించారు. అది విడుదల కాకముందే ‘తప్పటడుగులు’ పేరుతో మరో సినిమా ప్రకటించారామె. అందులో ఇద్దరు హీరోలు. ఒక హీరో రాజ్‌ కుమార్ కాగా మరో హీరోగా శేషారావును ఆమె ఎంపిక చేసుకున్నారు. అయితే జి. వరలక్ష్మి తొలిసారి దర్శకత్వం వహించిన ‘మూగజీవులు’ సినిమా విడుదలై పరాజయం పాలు కావడంతో ‘తప్పటడుగులు’ సినిమా ఆగిపోయింది. అప్పటి వరకూ శేషారావుగా తాను చేసిన ప్రయత్నాలు ఫలించకపోవడంతో ఆయన తన పేరును గిరిబాబుగా మార్చుకున్నారు. ఆ సమయంలో ఎస్.డి.లాల్ నుంచి గిరిబాబుకు కబురు వచ్చింది. ఆయన తీయబోతున్న ‘స్వర్గానికి నిచ్చెనలు’ సినిమాలో గిరిబాబుకు హీరో ఛాన్స్ ఇచ్చారు ఎస్.డి.లాల్‌. హీరోయిన్‌ గా వై. విజయను ఎంపిక చేశారు. ఈ సినిమా మొదటి రెండు సినిమాల మాదిరిగా కాకుండా పట్టాలెక్కింది. అంతేకాదు… ఆరు రీల్స్ షూటింగ్‌ కూడా జరిగింది. కానీ ఆ తర్వాత ఎస్.డి. లాల్‌ కు వచ్చిన ఆర్థికపరమైన ఇబ్బందుల కారణంగా సినిమా పూర్తి కాలేదు. పేరు మార్చుకున్నా కలిసి రాలేదని భావిస్తున్న గిరిబాబుకు ఎ. పూర్ణ చంద్రరావు రూపంలో జాక్ పాట్ తగిలింది. పి.వి. సుబ్బారావుతో కలిసి ఏ. పూర్ణచంద్రరావు నిర్మించిన ‘జగమే మాయ’ చిత్రంతో గిరిబాబు వెండితెరకు పరిచయం అయ్యారు. ఈ సినిమాకు ఐ.యస్. మూర్తి దర్శకత్వం వహించారు. ఈ సినిమా 1973 జూలై 28న విడుదలైంది. విశేషం ఏమంటే… ‘జగమేమాయ’ సినిమా విడుదల కాకుండానే గిరిబాబుకు దాదాపు ఇరవై సినిమాలలో నటించే అవకాశం వచ్చింది. ఆ తర్వాత ఆయన ఇక వెనుదిరిగి చూసుకోలేదు. అలా నటుడిగా కెరీర్‌ ప్రారంభించిన గిరిబాబు నిర్మాతగా, దర్శకుడిగానూ తనదైన ముద్రను తెలుగు తెరపై వేశారు. సినిమాల్లోకి రాకముందే మాదాల రంగారావుతో కాలేజీ రోజుల్లో గిరిబాబుకు పరిచయం ఉండేది. ప్రజానాట్య మండలికి చెందిన నల్లూరి వెంకటేశ్వర్లు శిష్యరికంలో మాదాలతో పాటు గిరిబాబు పలు నాటకాలు వేశారు. ఆ స్నేహం ఆ తర్వాత కూడా కొనసాగింది. మాదాల రంగారావు నటించి, నిర్మించిన పలు చిత్రాలలో గిరిబాబు నటించారు. అలానే గిరిబాబు జయభేరి పతాకంపై నిర్మించిన సినిమాలలోనూ మాదాల రంగారావు నటించారు. వీరిద్దరితో మురళీమోహన్ కూ మంచి స్నేహం ఉండేది. అప్పట్లో ఈ మిత్రత్రయం గురించి మద్రాసులో గొప్పగా చెప్పుకునేవారు.
ఫిల్మ్ ఛాంబర్‌కు గిరిబాబు పార్దీవ దేహం
83 సంవత్సరాల వయసులో తుదిశ్వాస విడిచిన గిరిబాబుకు సినీ ప్రముఖులు నివాళులు అర్పించారు. ఆయన భౌతిక కాయాన్ని శనివారం రాత్రి 7.00 గంటల నుంచి 9.00 గంటల వరకూ ఫిల్మ్ నగర్ లోని ఛాంబర్‌లో సినీ ప్రముఖులు, అభిమానుల సందర్శనార్దం ఉంచబోతున్నారు. ఆ తర్వాత గిరిబాబు స్వగ్రామం రావినూతలకు తరలిస్తారు. ఆదివారం మధ్యాహ్నం రావినూతలలో అంత్యక్రియలు జరుగనున్నాయి.